انتى زى مانتى

انتى انتى زى مانتى

رغم اللى حصل فضلتى كبيرة وما انكسرتى

هما خسروا وانت قوية ما خسرتى

ظلموكى بشدة

عملوكى كورة كله سابك فى وقت الشدة

رفعولك علم وقالوا وطنية

ميعرفوش انك اكبر بكتير من علم واغنية

اكبر من طرحة بالوان العلم على راس صبية

يا مصر عشقك مالى قلبى

نيلك فى عروقى هو دمى

اعدام الشرفاء

على اسم مصر التاريخ بس يقدر يقول ما شاء

اما مصر الحاضر قد اصبحت مجرد اشلاء

على ارض مصر فى الماضى عاش ومر الانبياء

وعلى ارض مصر اليوم لا وجود للشرفاء

ومن اهل مصر زمان اتعلم الكون العلم وعظمة البناء

واهل مصر اليوم يبكون على ضياع الابناء

كان اجدادى زمان هم اذكى من الذكاء

كان الذكاء يوصف بمصريته والمصرى لا ينعت بالذكاء

دلوقتى مات الحلو من كل الاشياء

ومبقاش لمصر ولا للمصرى غير الجهل والفقر والغباء

ولما يوصل بينا الحال لهذا الشقاء

اذن لما ينطق جاهل ويسب مصر ويردد بدون فهم زى البغبغاء

فالحال هو ان نصمت ان نسكت ان نبقى كلنا خرساء

لان مصر الان فقدت الذكاء

فقدت فن البناء

فى مصر صدر الحكم باعدام الشرفاء

كل سنة و انت مش طيب

احمد فؤاد نجم قالها كل سنة وانت طيب واحنا مش طيبيين

انا المرة دى هقولها كل سنة بتعشيها بنعيش احنا متهانين

كل سنة بتحكمها بتعدى علينا سنين

انت ظالم وحكومتك ظالمة

واحنا غلابة ومظلومين

مانعرف دى عيشة اللى احنا عايشينها

ولا احنا اصلا ميتيين

ابوس ايدك ارحمنا وسبها لغيرك يحكمها

ولا هى متعتك انك تشوفنا جعانين

ياريس كان نفسى احبك بس انت مرمغتنا فى الطين

كان نفسى اقولك كل سنة و انت طيب

بس هقولهالك ازاى وانت سايبنا متمرماطين

فتحت عينى على الدنيا لئيتك حاكمنا وشوف انا عمرى كام وعشرين

طيب يعنى انت ياريس متعبتش دانت ياريس كملت التمانين

بصراحة انت ياريس صعبان علينا واحنا كمان على نفسنا صعبانين

وكمان على نفسنا زعلانين

بصراحة احنا فى عصرك تعبانين

مش مرتاحين

طول ما حكومة من بعد حكومة بتسرقنا هنفضل كده ميتيين

وجعانين

كان نفسى اقولك كل سنة وانت طيب

بس انت مدتنيش فرصة اقولها

تعرف دلوقتى انا نفسى اقولك ايه ؟؟

نفسى تتكل واقول عليك الف رحمة ونور تنزل عليه

مع انك على حالنا ده وحالك مش هتخلينى كده اقولهاك

كده هتخلينى اقولك ربنا يخدك

ولما عزرائيل ان شاء الله ياخد اجلك

هقولها للى خلقنى انى مش مسامحك

وكل سنة وانت مش طيب علشان احنا مش طيبيين

وصية

وصية لكل انسان عرفنى او معرفنيش

وصية لكل صاحب ليا

وصيه لو اتمسكت او اختفيت او فجأة مشفتونيش

وصيه انكم يا اخواتى

يا صحابى

يا مصريين

متسيبونيش

اقتلوا السلبيه جواكم

انتفضوا ومتبيعونيش

انا مش مذنب انا بس مصرى اتكلم اصل الحال معجبنيش

لو جرالى حاجة مش هخاف

بس هزعل لو سكتوا وما ثورتوليش

ياللي سبت البلد ومشيت

ياللى سبت البلد ومشيت

وقلت البلد مش ليا وهجيت

هترجع تاني ولا خلاص مش راجع

ده في ناس هنا غيابك في قلبهم واجع

اوعى تنسى اهلك فيوم لتهلك

وصدقنى يا ولدي بره بلدك مش هتسلك

صحيح انت فى بلدك كنت مخنوء

بس اوعى تفتكر انك فى الغربة هتروء

انت اللى كنت هنا سلبي وزيك زي غيرك

يمكن لو كنت حاولت يمكن كان اتصلح حالك

اوعى تكون فاكر ان زويل عنك يتخير

ده الفرق بينك وبينه انه حلم وهو صغير

ولما حلم كبر فبنا

بنا اسمه ولنفسه كتير عمل

مع انه انسان عادي

بس عنده بربه ايمان وشوية امل

وكان زمان عنك مايتخير

بس الفرق انه حلم وهو صغير

انت فاكرني هندي ؟؟؟؟

انت فاكرني هندي ؟؟؟ !!

بقولك ايه يا اخ تشترى منى الساعة دى ب 450 جنيه انا شاريها من فرنسا ب 500 يورو بس انا محتاج فلوس علشان كده ببعها بالسعر ده. فرجنى كده .. ايه ده يا عم انت بتشتغلنى ايه انت فاكرنى هندى ؟!! دى ساعة مضروبة يادوب سعرها 25 جنيه.



تعمدت ان ابدأ المقالة بهذا الموقف الذى كثيرا ما يحدث بين المصريين فى حياتهم اليومية او يحدث مواقف مشابهة ولكن غالبا الرد ما يكون واحد وهو انت فاكرنى هندى؟!! فهذا الرد هو كلمة شائعة جدا فى العامية المصرية وهذا الرد كناية للسذاجة بمعنى اننا كمصريين نرى من وجهة نظرنا ان الهنود شعب غبى وساذج وطبعا هذا الكلام على اساس اننا شعب فهلوي ومينضحكش عليه ويتمتع بأكبر قدر من الذكاء بين شعوب العالم اجمع ولسنا مثل الهنود الاغبياء الذين يتركون افيالهم على اول الشارع كما ندعى فى مصر. ولكن لو فكرنا فى عمل مقارنة بسيطة بيننا وبين الهنود اللذين نسخر منهم ومن سذاجتهم سنجد انهم هم من لهم الحق بأن يسخرو منا وليس هم وحدهم فقط من لهم حق السخرية منا ولكن غالبية شعوب العالم لهم الحق فى ذلك اما عن الهنود اللذين نسخر منهم اذا نظرنا الى ما استطاعوا ان يفعلوه فى 63 سنة من بعد استقلالهم من الاحتلال البريطاني سنجد انهم استطاعوا ان يحققوا الكثير والكثير وبالنسبة لنا فما حققوه بمثابة المعجزات مثل تقدمهم التكنولوجي والعسكري والفني وانما نحن يكفينا انجازات ونسيب الدول الاخرى تاكل عيش هو احنا يعني هناخد زمنا وزمن غيرنا فنحن من يمتلك حضارة 7000 سنة و قلنا هنبني وادينا بنينا السد العالي. و من بعدها حاربنا وعبرنا وانتصرنا وهذا بخلاف7 بطولات امم افريقيا و واحده ستار اكاديمى على يد البطل الاسطورى المعجزة محمد عطية وكمان ربنا يخلي الاهلى اللى مشرفنا ومفرحنا على طول فلا عيب علينا ان استرحنا قليلا او حتى كثيرا عن تحقيق الانجازات وتركنا مجالا لغيرنا من الدول والشعوب ان تتطور وتتنور وكمان مصر ام الدنيا والجميع يعلم ان الام دائما تريد ان يكون اولادها افضل منها لذلك ومن هذا المنظور تريد مصر ان يكون اولادها من الدول والشعوب الاخرى افضل منها ولا اعتراض طبعا عند المصريين . وبرجوعنا مرة اخرى للشعب الهندى الساذج اريد ان اعرض ما فعله هؤلاء الاغبياء منذ استقلالهم .
اولا: فى مجال تقنية المعلومات يعتبر هذا المجال اسرع المجالات نموا واذهارا بالنسبة للاقتصاد الهندى ويدر على الهند حوالى 13 بليون دولار سنويا.
ثانيا: يحتل الاقتصاد الهندى المركز العاشر عالميا من حيث تبادل العملات.
ثالثا: فى مجال الفضاء اطلقت الهند مركبة فضائية لسطح القمر و بعد عشرين دقيقة من الإطلاق وضع الصاروخ الهندي المركبة التي يحملها في مدار انتقالي حول الأرض، وذلك من أجل القيام بدراسات وتجارب علمية لطبقات القمر وسطحه، وما قد يكون فوقه من مياه ومعادن، ولا سيما عنصر الهيليوم النادر على الأرض، والذي قد يلعب في المستقبل دوراً مهماً كبديل للطاقة.
رابعا: التفوق فى المجال الطبى للهند.
خامسا: انتاج الهند لارخص سيارة فى العالم وطرحها فى الاسواق العالمية بسعر 1979 دولار.
سادسا: هو انى لن ستطيع ان استعرض الانجازات الهندية فى مقالة لانها تحتاج ليس مئات بل ألوف الكتب والمجلدات والرسائل والدراسات العلمية كما هو الحال بالنسبة للاخفاقات و نتائج الفشل المصرية هى ايضا يمكن ان تكتب فى ألوف الكتب والمجلدت هذا ان كان من الممكن ان تحصى . بعد هذه الحقائق التى عرضتها يجب ان يصحح الخطأ واذا اردت ان تبين لغيرك انك لست ساذج فيجب ان تقول له " انت فاكرنى مصرى ؟!! " اخيرا اريد ان اوضح انى لست ناقم على مصر او كاره لها وانما عشقها يسرى فى شراينى ليس مع دمى فعشقها هو دمى و ترابها اثمن عندى من اللؤلؤ والمرجان ولذلك كتبت هذا الكلام اريد ان يعى كل مصرى اننا من نهين مصر واسمها وليس هى من تهيننا هى التى لها حق فى ان تكرهنا وليس نحن .

وقبل الختام لم يتبقى لدى سوى بعض كلماتى المتواضعة التى اهديها لكل من عاش على ارض مصرنا الطاهرة وفكر يوما فى تركها .

ياللى سبت البلد ومشيت

وقلت البلد مش ليا وهجيت

هترجع تاني ولا خلاص مش راجع

ده في ناس هنا غيابك في قلبهم واجع

اوعى تنسى اهلك فيوم لتهلك

وصدقنى يا ولدي بره بلدك مش هتسلك

صحيح انت فى بلدك كنت مخنوء

بس اوعى تفتكر انك فى الغربة هتروء

انت اللى كنت هنا سلبي وزيك زي غيرك

يمكن لو كنت حاولت يمكن كان اتصلح حالك

اوعى تكون فاكر ان زويل عنك يتخير

ده الفرق بينك وبينه انه حلم وهو صغير

ولما حلم كبر فبنا

بنا اسمه ولنفسه كتير عمل

مع انه انسان عادي

بس عنده بربه ايمان وشوية امل

وكان زمان عنك مايتخير

بس الفرق انه حلم وهو صغير

ختاما اتمنى ان تصنع كلماتى البسيطة شيئا .